„თავისუფალმა საქართველომ“ 92 წლის პენსიონერის გამოსახლება შეაჩერა, ამის შესახებ დღეს გამართულ ბრიფინგზე პარტია “თავისუფალი საქართველოს” ხელმძღვანელმა - კახა კუკავამ განაცხადა.
მისი თქმით, ბოლო რამოდენიმე დღის მანძილზე იუსტიციის სამინისტრომ საქართველოს მთელ ტერიტორიაზე განაახლა მოვალეების იძულებითი აუქციონებისა და გამოსახლების პროცესები, შეტყობინება ეგზავნებათ საქართველოს ყველა რეგიონში მცხოვრებ პირებს.
„თავისუფალი საქართველო“ აცხადებს, რომ მათი იურისტები გაუწევენ იურიდიულ დახმარებას ყველა მსურველს, თუკი დროულად მიაწოდებენ სათანადო დოკუმენტაციას და მიმართავს სასამართლოს კანონით გათვალისწინებული ფორმით იძულებითი აღსრულების ერთჯერადად გადადების მოთხოვნით.
კუკავას განცხადებით, პირველი ასეთი განცხადება თბილისის საქალაქო სასამართლომ უკვე განიხილა და მოსამართლე - ანა ჩოგოვაძემ 92 წლის პენსიონერის გურამ ქურიძის გამოსახლება ჯანმრთელობის მდგომარეობის გათვალისწინებით შეაჩერა.
„თავისუფალი საქართველო“ მოუწოდებს მოვალეებს დაგეგმილი გამოსახლებისა თუ აუქციონის შესახებ ინფორმაცია პარტიის ცხელ ხაზზე დროულად მიაწოდონ.
Email: Freegeorgia2010@gmail.com
Tel: 574 02 46 46, 598 34 05 17.
